Шығыс Қазақстан облысының әкімі Нұрымбет Сақтағанов өзінің бірінші орынбасарына қатысты сыбайлас жемқорлық ісі бойынша шыққан сот үкімі заңды күшіне енгеннен кейін қызметінен кетуге өтініш білдірді.
Қолданыстағы заңнама талаптарына сәйкес, тікелей қол астындағы қызметкері жемқорлық қылмысы үшін айыпты деп танылған жағдайда, бірінші басшы міндетті түрде отставкаға өтініш беруі тиіс. Осы ережеге сүйенген өңір басшысы өз еркімен жұмыстан босатуды сұрағанымен, оның бұл өтініші қабылданбағандығын облыс әкімінің баспасөз хатшысы Лаура Жақыпова растады.
Еске сала кетсек, бұған дейін облыс әкімінің бірінші орынбасары Жақсылық Омар сыбайлас жемқорлық жасағаны үшін кінәлі деп танылып, 6 жыл мерзімге бас бостандығынан айырылған болатын. Тергеу органдарының анықтауынша, ол «материалдық көмек» деген желеумен құны шамамен 13 миллион теңге тұратын 2021 жылғы Toyota Camry автокөлігін заңсыз иемденген.